Je Bajeti ya Elimu 2012/2013 itaboresha mazingira ya shule kama hizi.

Shule hii ipo wilayani Muleba mkoani Kagera.

Ndani ya shule hii licha kuwa ni shule yenye kuta na kuezekwa kwa nyasi, 
bali pia wanafunzi wanakaa chini

Shule ya msingi Silabu wilayani Korogwe.Wanafunzi hawa wanasoma kwenye kichochoro
 kilichopo katikati ya madarasa mawili

 Shule ya msingi Silabu wilayani Korogwe.

Shule ya msingi Selous iliyopo wilayani Namtumbo mkoani Ruvuma.

 Bajeti ya elimu itasomwa bungeni siku ya Jumatatu, 13 Agosti. Wakati bajeti ya Elimu inasubiriwa kwa hamu na wadau na hasa wapenda maendeleo ya Elimu, Baadhi ya maeneo nchini bado yanakabiliwa na changamoto kubwa sana hasa hali mbaya ya miundombinu, ukosefu wa vyumba vya madarasa na majengo ya shule ambayo yamesababisha baadhi ya shule kuweka madarasa ya nyasi kama shule ya msingi Selous na Mkapa zilizopo wilayani Namtumbo, Shule ya msingi Silabu iliyoko wilayani Korogwe, Shule ya msingi Misunkumilo ya wilayani Nkasi, na baadhi ya shule wilayani Muleba.

Hali ya elimu imezidi kuwa mbaya kila kukicha, kiasi kwamba hata watu hudiriki kuuliza kama shule hizo zipo nchini, hasa wakiangalia juhudi na kelele nyingi zilizopigwa juu ya mchango mkubwa wa MMEM na MMES kuwa zimefanya kazi kubwa sana kuboresha mazingira ya kujifunzia hasa miundombinu ya shule.Swali Je, shule hizi ziliachwa wapi na mipango hii? Je bajeti ya elimu ya 2012/2013 itatatua baadhi ya changamoto za elimu nchini?na kuondokana na majengo haya yasiyo rafiki kwa mwanafunzi na mwalimu?

 Mwana blog ya HakiElimu, Hebu angalia jinsi ambavyo wanafunzi huko Tanga,Rukwa,Kagera na Ruvuma wanavyojifunza kwenyesehemu zinazokatisha tamaa : Watatoka?

Shule ya msingi Selous iliyopo Namtumbo. Wanafunzi wa darasa la tano wakiwa darasani 
na mwalimu akifundisha.

  

Wanafunzi wa darasa la kwanza katika shule ya Isensa ya wilayani Nkasi wakiwa darasa, darasa hili lina wanafunzi 211, mwalimu hana pa kukaa akifundisha hutoka nje kusubiri watoto wamalize kuandika.

Wanafunzi wa shule ya msingi Misunkumilo ya wilayani Nkasi wakisoma kwenye darasa lililoezakwa kwa turubai, shule hiyo ina madarsa mawili ya namna hiyo ambayo yanatumiwa na wanafunzi wa darasa la tatu, la nne na awali.

Shule hii ipo wilayani Muleba.

Hiki ni choo cha shule wilayani Muleba

Uhaba wa Madarasa: Wanafunzi wa Darasa la Tatu Korogwe Wasomea Uchochoroni

Wanafunzi wa darasa la tatu shule ya msingi Silabu wakiwa darasani.
Darasa hili ni uchochoro uliopo shuleni hapo unaotenganisha jengo hadi jengo.

Wanafunzi wa darasa la tatu wa Shule ya Msingi Silabu wakitoa salamu 
kwa mwanahabari wa Thehabari.com alipowatembelea.

Picha juu na Chini ni Wanafunzi wa darasa la tatu katika Shule ya Msingi Silabu
 wakiwa kwenye darasa lao.

Baadhi ya  walimu wa Shule ya Msingi Silabu, wakiwa kazini

 Mwalimu Mkuu wa Shule ya Msingi Silabu, Mizeki Charahani akiwa ofisini kwake.

 Na Joachim Mushi, Korogwe

WANAFUNZI wa darasa la tatu katika Shule ya Msingi Silabu iliyopo Wilaya ya Korogwe, mkoani Tanga wanasomea kwenye uchochoro unaotenganisha kati ya darasa moja na lingine kutokana na uhaba wa vyumba vya madarasa.

Wanafunzi hao ambao darasa lao limekuwa likihama kila muda kutengemea hali ya hewa (jua na mvua) kufuata kivuli wamelazimika kusomea nje kwenye uchochoro ambao haujaezekwa kutokana na uhaba wa vyumba vya madarasa shuleni hapo.

Akizungumza na mwandishi wa habari hizi hivi karibuni katika shule hiyo, Mwalimu Mkuu wa Shule ya Msingi Silabu, Mizeki Charahani alisema wanafunzi hao wamelazimika kusomea nje kwa kuwa wanavyumba vinne tu vya madarasa ambavyo havitoshelezi kwa mahitaji ya shule.

Akifafanua zaidi alisema darasa hilo eneo lao maalumu la kusomea (darasa) ni kwenye uchochoro unaotenganisha kati ya darasa moja na lingine, lakini huwa wanahama jua linapozidi au mvua kunyesha na kwenda eneo lingine linalokuwa na kivuli.

“Darasa hili kwa kweli huwa linahama kulingana na hali ya hewa, jua likizidi wanabeba madawati yao na kuhamia eneo lenye kivuli, mvua ikinyesa hivyo hivyo wanahamia sehemu nyingine…lakini muda mwingine tunawahamishia kwenye darasa moja na wenzao pale kunapokuwa hakuna mwingiliano wa vipindi,” alisema Charahani.

Alisema shule hiyo yenye darasa la kwanza hadi la saba unauhaba mkubwa wa vyumba vya madarasa kwani hata darasa la kwanza na la pili wanasomea kwenye darasa moja kwa kupokezana.

“Kutokana na uhaba wa vyumba vya madarasa hata hatuna darasa la awali wala ofisi ya walimu…na sisi ofisi yetu ipo hapa chini ya mti huu,” alisema Mwalimu huyo huku akionesha eneo moja chini ya mti ulio mbele ya madarasa ya shule hiyo.

Akizungumzia hali hiyo, Ofisa Elimu Taaluma, Halmashauri ya Mji wa Korogwe, Elius Mkwizu alikiri kuwepo kwa tatizo hilo la uhaba wa vyumba vya madarasa katika shule hiyo na kudai shule hiyo ni mpya hivyo ujenzi wake haukwenda sambamba na ongezeko la wanafunzi kimadarasa.

Alisema tayari uongozi wa idara hiyo kwa kushirikiana na wananchi unafanya ujenzi wa madarasa mawili ambayo yatasaidia kupunguza uhaba wa vyumba vya madarasa katika shule hiyo. Hata hivyo aliongeza ujenzi huo kwa sasa umesimama baada ya fedha zilizotengwa kurejeshwa hazina kuu baada ya kukaa kipindi kirefu bila kutumiwa.

Mwandishi wa habari hizi alishuhudia moja ya ujenzi wa darasa lililosimama baada ya kukosekana kwa fedha za kuliendeleaza. Akifafanua zaidi Mkwizu alisema kulikuwa na mvutano kati ya viongozi waliokuwawakisimamia ujenzi huo na wananchi hali iliozua mgogoro na ujenzi kusimama.

Habari hii imeandaliwa na gazeti tando la www.thehabari.com kwa ushirikiano na HakiElimu

Waliobainika kutojua kusoma, kuandika sekondari waendelea na shule

Ofisa-Elimu-Taaluma-Halmashauri-ya-Mji-wa-Korogwe-Elius-Mkwizu-akizungumza-na-Thehabari.com-hivi-karibuni-Wilayani-Korogwe.

Na Joachim Mushi, Korogwe
WANAFUNZI waliojiunga na masomo ya kidato cha kwanza mwaka huu katika shule za Serikali na baadaye kubainika kuwa hawajui kusoma na kuandika kwa ufasaha wanaendelea na masomo yao.
Uchunguzi uliofanywa na mwandishi wa habari hizi, katika baadhi ya shule za sekondari kwa wilaya za Korogwe na Moshi Mjini umebaini wanafunzi hao kuendelea na shule licha ya walimu kuwachuja na kutoa taarifa sehemu husika kama walivyo elekezwa.
Akizungumza hivi karibuni katika mahojiano mjini Moshi, Mwalimu Mkuu Msaidizi wa Shule ya Sekondari Mawenzi, Domin Kweka alisema kwa mujibu wa vigezo vilivyotolewa na Wizara ya Elimu na Mafunzo ya Ufundi kubaini wanafunzi wanaofaulu kujiunga na sekondari, wasio na sifa jumla ya wanafunzi sita walibainika.
Alisema wanafunzi hao walishindwa kabisa kufanya vizuri katika mtihani waliopewa jambo ambalo lilionesha ulakini katika kujiunga kwao na masomo ya sekondari, japokuwa wanaendelea na shule hadi sasa.

Mwalimu-Mkuu-wa-Shule-ya-Sekondari-Nyerere-Memorial-ya-Wilayani-Korogwe-Steven-Killo-akizungumza-na-Thehabari.com-hivi-karibuni.1

 “Sisi tuliwapata sita, hawa walikuwa hawajui kusoma na kuandika na kutoa taarifa sehemu husika tunasubiri utaratibu mwingine…lakini hadi muda huu wanaendelea na masomo ya kidato cha kwanza,” alisema Kweka.
Aidha aliongeza kuwa tatizo hilo hujitokeza kila mwaka kwa wanafunzi wanaojiunga na kidato cha kwanza na hadi sasa katika madarasa mbalimbali wapo wanafunzi wasiojua kusoma na kuandika.
Alisema kwa shule hiyo ya Mawenzi kidato cha kwanza kina wanafunzi sita wasiojua kusoma na kuandi, kidato cha pili wanafunzi sita, kidato cha tatu wanafunzi watatu huku kidato cha nne kikiwa na wanafunzi wawili wasiojua kusoma na kuandika.
Uchunguzi uliofanywa wilayani Korogwe pia ulibaini wanafunzi walioshindwa kufaulu katika mchujo uliotolewa na Serikali kuendelea na masomo ya kidato cha kwanza, licha ya shule kadhaa za sekondari kupeleka majina hayo kwa viongozi wa idara husika.
Mwalimu Mkuu wa Shule ya Sekondari Nyerere Memorial ya Wilayani Korogwe, Steven Killo alikiri shule yake kuwa na baadhi ya wanafunzi kadhaa wasiojua kusoma na kuandika hata katika madarasa mengine japokuwa hakutaja idadi.
Aidha aliongeza kuwa katika shule hiyo mchujo kwa wanafunzi wapya waliojiunga kidato cha kwanza walibaini kuwepo kwa mwanafunzi mmoja asiyejua kusoma na kuandika na kuwasilisha taarifa kwa viongozi wa idara ya elimu wilaya na hakukuwa na maelekezo yoyote baada ya taarifa.
Akizungumzia suala hilo Ofisa Elimu Taaluma, Halmashauri ya Mji wa Korogwe, Elius Mkwizu alisema hata hivyo nia ya Serikali kuwapima wanafunzi hao haikuwa kuwarejesha nyumbani bali kujua tatizo hilo na kuangalia namna ya kulidhibiti.
 
Imeandaliwa na gazeti tando la Thehabari.com kwa ushirikiano na HakiElimu Tanzania

Uwekezaji katika elimu ya awali hauepukiki. Serikali ichukue hatua

Wanafunzi wa darasa la awali katika shule ya msingi misunkumilo wilayani nkasi wakirudi nyumbani baada ya masomo.

Elimu ya awali ni muhimu sana hasa kwasababu ni msingi mzuri katika kumtayarisha mtoto kuanza kukabiliana na changamoto za elimu hasa elimu ya msingi kwani humtayarisha mtoto ili kuanza kupenda elimu na hivyo kufanya vyema katika ngazi zinazofuata za elimu kuanzia msingi, sekondari na elimu ya juu.

Kuona umuhimu wa elimu ya awali, Tanzania ilianzisha mfumo wa elimu unaotaka kila shule ya msingi kuwa na darasa la awali ili kuandaa watoto wa watakaoingia darasa la kwanza.Watoto hawa huandikishwa elimu ya awali wafikapo miaka mitano au sita ili wafikapo miaka saba wanaaza darasa la kwanza.

Uwekezaji kama huu ni wa kukatisha tamaa katika elimu.Darasa la awali katika shule ya msingi Selous wilayani Namtumbo

Hii ni hatua muhimu sana na kama uwekezaji wa kutosha utafanyika, basi tanzania siku moja itashuhudia ukuaji mkubwa wa kiwangio cha elimu. baadhi ya nchi za Afrika zinazofanya vyema sana katika elimu ya awali ikianzia miaka mitano ya toka mtoto anazaliwa (Early Childhood Education) ni Nigeria,Afrika ya kusini na Ghana ambazo zimewekeza vilivyo katika elimu ya awali (watoto) na matokeo yake yamezifanya nchi hizi kuwa na viwango vya juu vya elimu Afrika nzima.

Ripoti ya mwaka huu (2012) ya Shirika la Kuhudumia Watoto la Umoja wa Mataifa (Unicef) kuhusu hali ya watoto, inaonesha dhahiri umuhimu wa elimu ya awali katika kupunguza watoto wa mitaani.zaidi ya watoto milioni 200 kutoka nchi zinazoendelea ikiwemo Tanzania hushindwa kutumia fulsa za elimu ipasavyo kutokana na mifumo mibovu ya elimu ya awali. 
 

Hivyo, uwekezaji wa kweli unaozingatia upatikanaji wa huduma muhimu kwa watoto wote ili kutoa fursa sawa ya kujiendeleza na kuweka misingi ya watoto kupenda kusoma ni muhimu sana ili kuinusuru elimu ya Tanzania.

Hivi karibuni ililipotiwa na vyombo vya habari kuwa zaidi ya wanafunzi 5,000 waliofaulu na kujiunga na kidato cha kwanza walibainika kutokujua kusoma na kuandika hali inayolalamikiwa kuwa chanzo chake ni uwekezaji mdogo katika shule za msingi inayoanzia na elimu ya awali.

Shule za msingi wilayani Nkasi na uhaba wa vyumba vya kusomea

Wanafunzi wa shule msingi Misunkumilo ya wilayani Nkasi wakisoma kwenye darasa lililoezakwa kwa turubai, shule hiyo ina madarsa mawili ya namna hiyo ambayo yanatumiwa na wanafunzi wa darasa la tatu, la nne na la awali. Shule hii ipo  mita 400 tu kutoka makao makuu ya wilaya ya nkasi.

 

Wanafunzi wa darasa la kwanza katika shule ya msingi Isensa wakiwa darasani, darasa hili lina wanafunzi 211, mwalimu hana pa kukaa akifundisha hutoka nje kusubiri watoto wamalize kuandika. Picha na mpiga picha wa HakiElimu